|
ویب ڈیسک—امریکہ اور کولمبیا میں تارکینِ وطن کی واپسی کے حوالے سے اتفاق ہو گیا ہے جس کے بعد واشنگٹن نے کولمبیا پر پابندیاں عائد نہ کرنے کا اعلان کیا ہے۔
وائٹ ہاؤس نے ایک بیان میں کہا ہے کہ دونوں ممالک میں اتفاق ہو گیا ہے کہ کولمبیا اپنے تارکیںِ وطن کو بغیر کسی پابندی کے قبول کرے گا اور یہ تارکینِ وطن امریکہ کے فوجی طیاروں کے ذریعے کولمبیا پہنچائے جائیں گے۔
کولمبیا کے صدر گستاؤ پیٹرو نے قبل ازیں امریکہ سے دو فوجی طیاروں کے ذریعے واپس لائے جانے والے تارکینِ وطن کو قبول کرنے سے انکار کر دیا تھا۔
انہوں نے کہا تھا کہ وہ تارکینِ وطن کو اسی صورت میں قبول کریں گے جب امریکہ ان کے ساتھ عزت سے پیش آئے گا۔
انہوں نے کولمبیا کے تارکینِ وطن کی واپسی کے لیے سویلین طیارے استعمال کرنے پر بھی زور دیا تھا۔
تارکین وطن کی واپس پر اتفاق کے بعد وائٹ ہاؤس نے اتوار کو رات گئے جاری ایک بیان میں کہا کہ امریکہ نے کولمبیا پر پابندیاں اور ٹیرف عائد کرنے کے معاملے کو ابھی روک دیا ہے اور اس حوالے سے احکامات پر دستخط نہیں کیے گئے۔ البتہ ان پابندیوں کا مسودہ موجود رہے گا۔
وائٹ ہاؤس نے متنبہ کیا کہ کولمبیا کی جانب سے معاہدے پر عمل نہ کرنے کی صورت میں اس مسودے پر دستخط ہو سکتے ہیں۔
وائٹ ہاوس نے کہا کہ امریکی محکمۂ خارجہ کی کولمبیا کے کئی حکام پر ویزا پابندیاں اور کسٹم کا معائنہ اس وقت تک برقرار رہے گا جب تک تارکینِ وطن کا پہلا طیارہ کولمبیا میں لینڈ نہیں کر جاتا۔
دوسری جانب کولمبیا کی وزارتِ خارجہ نے کہا ہے کہ امریکہ کے ساتھ پیدا ہونے والے تعطل کو دور کر دیا گیا ہے۔
وزارتِ خارجہ کے مطابق کولمبیا کے وزیرِ خارجہ گیلبرتو مریلو اور امریکہ میں کولمبین سفیر واشنگٹن ڈی سی جا رہے ہیں تاکہ اس معاہدے پر پیش رفت کے حوالے سے امریکہ کے اعلیٰ حکام سے ملاقاتیں کر سکیں۔
کولمبیا نے کہا ہے کہ وہ اپنے لوگوں کی واپسی کا خیر مقدم کرتا ہے اور ان شہریوں کو اچھے حالات کی ضمانت دے گا۔
امریکہ اور کولمبیا میں تارکینِ وطن کی واپسی پر اتفاق سے قبل دونوں ممالک کے رہنماؤں میں بیانات نے شدت اختیار کر لی تھی۔
امریکہ کے صدر ڈونلڈ ٹرمپ نے عندیہ دیا تھا کہ کولمبیا سے آنے والی اجناس پر فوری طور پر 25 فی صد ٹیرف عائد کیا جا رہا ہے جو ایک ہفتے میں 50 فی صد تک بڑھایا جائے گا جب کہ کولمبیا کے دارالحکومت بگوٹا میں امریکہ کا سفارت خانہ ویزا پروسیسنگ بند کر دے گا۔
دوسری جانب کولمبیا کے صدر گستاؤ پیٹرو نے امریکی اجناس پر 25 فی صد ٹیرف کے اطلاق کا اعلان کیا تھا۔
انہوں نے کہا تھا کہ سب تارکینِ وطن جرائم پیشہ نہیں ہیں۔ ان سے عزت کے ساتھ پیش آنا چاہیے جس کے تمام انسان حق دار ہیں۔
انہوں نے تارکینِ وطن کو لانے والے امریکہ کے طیاروں کے حوالے سے کہا کہ یہی وجہ تھی کہ کولمبیا کے تارکینِ وطن کو واپس لانے والے امریکہ کے فوجی جہازوں کو واپس بھیجا۔
ان کا کہنا تھا کہ عام جہازوں میں، مجرموں جیسا سلوک کیے بغیر واپس لائے جانے والے ہم وطنوں کو کولمبیا قبول کرے گا۔
امریکہ اور کولمبیا میں یہ تنازع اس وقت شروع ہوا جب امریکی حکام نے غیر قانونی تارکینِ وطن کو واپس ان کے ممالک بھیجنے کا عمل شروع کیا۔
لاطینی امریکہ کے ممالک میں کولمبیا امریکہ کا تیسرا بڑا تجارتی شراکت دار ہے۔
اتوار کو امریکہ کے نائب صدر جے ڈی وینس نے نشریاتی ادارے ‘سی بی ایس’ سے گفتگو میں کہا کہ امریکہ میں امیگریشن کا قانون نافذ کرنے جا رہے ہیں۔
امریکہ کے امیگریشن اینڈ کسٹم انفورسمنٹ نے کہا ہے کہ اتوار کو امریکہ میں 956 غیر قانونی تارکینِ وطن کو حراست میں لیا گیا۔
ٹرمپ نے اپنی انتخابی مہم کے دوران غیر قانونی تارکین وطن کے خلاف کارروائی کا عزم ظاہر کیا تھا۔ انہوں نے اپنی دوسری مدت صدارت کا آغاز ایسے احکامات کے ساتھ کیا ہےجن کا مقصد امریکہ میں داخلے کے نظام کی اصلاح کرنا ہے ۔
اس رپورٹ میں شامل بعض معلومات خبر رساں اداروں ایسوسی ایٹڈ پریس اور رائٹرز سے لی گئی ہیں۔