ایران کے وزیرِ داخلہ کے مطابق ایرانی صدر کے ہیلی کاپٹر نے خراب موسم کے باعث ‘ہارڈ لینڈنگ کی، تاہم خراب موسم کے باعث ریسکیو آپریشن میں مشکلات کا سامنا ہے۔
ایران کی اسپیشل فورسز کو بھی الرٹ کر دیا گیا ہے۔ ایرانی میڈیا کے مطابق حادثہ ایران، آذربائیجان سرحد کے قریب ایرانی علاقے جلفا کے قریب پیش آیا۔ ایرانی صدر کے ہمراہ وزیرِ خارجہ، ایران کے مشرقی آذربائیجان صوبے کے گورنر، اعلٰی حکام اور باڈی گارڈز سوار تھے۔
رپورٹس کے مطابق ایران کے صدر آذربائیجان اور ایران کے مشترکہ ڈیم منصوبوں کے افتتاح کے لیے اتوار کی صبح آذربائیجان کے سرحدی علاقے میں پہنچے تھے۔
تقریب کے بعد تین ہیلی کاپٹرز واپس ایران کے لیے روانہ ہوئے تھے جن میں سے دو ایرانی شہر تبریز میں لینڈ کر گئے تھے، تاہم ایرانی صدر کو لانے والے ہیلی کاپٹر نے خراب موسم کے باعث ‘ہارڈ لینڈنگ’ کی۔