|
روس کے صدر ولادیمیر پوٹن نے بدھ کو کہا کہ روس کو پڑوسی ملک یوکرین کے خلاف ان کے ملک کی تین سالہ جنگ کے حل سے قبل امریکہ کے ساتھ اعتماد کے قیام کی ضرورت ہے۔
پوٹن نے سینٹ پیٹرزبرگ میں صحافیوں کو بتایا کہ وہ منگل کو سعودی عرب میں اعلیٰ امریکی اور روسی حکام کے درمیان ہونے والی اعلیٰ سطحی بات چیت کے نتائج سے خوش ہیں، انہوں نے انہیں “اعلیٰ” قرار دیتے ہوئے اعلان کیا کہ یہ ماسکو اور واشنگٹن کے درمیان متنازعہ تعلقات کو بہتر بنانےکی جانب پہلا قدم ہے۔
تاہم انہوں نے کہاکہ “روس اور امریکہ کے درمیان اعتماد کی سطح کو بڑھائے بغیر یوکرینی بحران سمیت بہت سے مسائل کو حل کرنا ناممکن ہے۔”
پوٹن نے ٹیلی ویژن پر نشر ہونے والےبیان میں کہا کہ وہ امریکی صدر ڈونلڈ ٹرمپ کے ساتھ سربراہی اجلاس منعقد کرنا چاہیں گے، لیکن اس کیلئے تیاری کی ضرورت ہے تاکہ کوئی نتائج سامنے آسکیں۔
امریکی وزیر خارجہ مارکو روبیو اور روسی وزیر خارجہ سرگئی لاوروف کی سربراہی میں ریاض مذاکرات، روس کے 2022 میں یوکرین پر حملے اور حملے کو روکنے کے لیے کیف کی افواج کو مسلح کرنے کی امریکی قیادت میں مغربی کوششوں کے بعد، تین سال سے زائد عرصے میں دو بڑی طاقتوں کے درمیان پہلی اہم بات چیت تھی۔
پوٹن نے سینٹ پیٹرزبرگ میں ایک ڈرون فیکٹری کے دورےمیں کہا کہ”میری رائے میں، ہم نے باہمی مفادات کے مختلف شعبوں میں کام کی بحالی کے لیے پہلا قدم اٹھایاہے۔”
نہ تو یوکرینی اور نہ ہی یورپی حکام مذاکرات کے لیے سعودی عرب میں میز پر تھے، لیکن امریکہ نے کہا کہ وہ دوسری جنگ عظیم کے بعد یورپ کے سب سے مہلک تنازعے کو ختم کرنے کی کوشش کے لیے مستقبل کے مذاکرات میں شامل ہوں گے۔آئندہ ہفتے ماسکو کے یوکرین پرحملے کے آغازکے تین سال مکمل ہوجائیں گے۔
صدر ٹرمپ کا تبصرہ
اپنے ٹروتھ سوشل پلیٹ فارم پر بدھ کے روز ایک نئے تبصرے میں، ٹرمپ نے زیلنسکی کو ایک “آمر” قرار دیا۔
“میں یوکرین سے محبت کرتا ہوں، لیکن زیلنسکی نےانتہائی بری کارکردگی دکھائی ہے، ان کا ملک بکھر گیا ہے، اور لاکھوں غیر ضروری طور پر مر چکے ہیں – اور یہ جاری ہے…،” انہوں نے لکھا۔
یوکرین میں امریکی سفیر ’سننے کے لیے‘
کیف میں ٹرمپ کے یوکرین کے ایلچی جنرل کیتھ کیلوگ ے ساتھ بات چیت سے پہلے، زیلنسکی نے یوکرین ٹی وی کو بتایا، “صدر ٹرمپ … بدقسمتی سے غلط معلومات کی جگہ میں رہتے ہیں۔”
ایلچی، جنرل کیتھ کیلوگ نے کہا کہ امریکہ مزاکرات کے ذریعہ جنگ کے کسی بھی خاتمے کے لیے یوکرین کے لیے سلامتی کی ضمانتوں کی ضرورت کو سمجھتا ہے۔
کیلوگ نے کہا کہ وہ یوکرین میں وہاں کے رہنماؤں کے خدشات سننے کے لیے تھے،اور ٹرمپ سے مشورہ کرنے کے لیے امریکہ واپس آئے ہیں۔
وی او اے نیوز