|
پاکستان کے زیرِ انتظام گلگت بلتستان کے علاقے چلاس میں مسافر بس گہری کھائی میں گرنے سے 16 افراد ہلاک اور 20 سے زیادہ زخمی ہو گئے ہیں۔
بلتستان حکومت کے ترجمان فیض اللہ فراق کے مطابق مسافر بس راولپنڈی سے گلگت آ رہی تھی جو یشوکھل کے قریب موڑ کاٹتے ہوئے کھائی میں جا گری۔
ترجمان کے مطابق حادثہ جمعے کی صبح لگ بھگ پانچ بجے پیش آیا جب کہ حادثے میں زخمی ہونے والے 22 مسافروں کو ریجنل ہیڈ کوارٹر اسپتال منتقل کر دیا گیا ہے۔
فیض اللہ فراق کے مطابق چلاس اسپتال میں ایمرجنسی نافذ کر دی گئی ہے۔
وزیرِ اعلیٰ گلگت بلتستان حاجی گلبر خان نے بس حادثے میں قیمتی انسانی جانوں کے ضیاع پر افسوس کا اظہار کیا ہے۔
واضح رہے کہ گلگت بلتستان سیر و سیاحت کے لیے مشہور ہے لیکن وہاں جانے والے راستے پرخطر اور دشوار گزار ہیں۔