کراچی پولیس نے غیر ملکی شہریوں پر حملہ کرنے والے خودکش بمبار اور اس کے ساتھی کو ہلاک کرنے کا دعویٰ کیا ہے۔
وائس آف امریکہ کے نمائندے محمد ثاقب کے مطابق ترجمان کراچی پولیس کا کہنا ہے کہ مانسہرہ کالونی میں دہشت گردوں نے غیر ملکیوں کی گاڑی پر حملہ کیا جسے پولیس نے ناکام بناتے ہوئے حملہ آوروں کو ہلاک کر دیا ہے۔
پولیس ترجمان کے مطابق تمام غیر ملکی مہمان محفوظ ہیں جب کہ سیکیورٹی فورسز نے علاقے کو گھیرے میں لے لیا ہے۔
خبر رساں ادارے ‘رائٹرز’ کے مطابق دہشت گردوں نے جاپانی شہریوں کی گاڑی کو نشانہ بنانے کی کوشش کی تھی۔ تاہم اب تک کسی تنظیم نے حملے کی ذمے داری قبول نہیں کی ہے۔
واضح رہے کہ گزشتہ ماہ دہشت گردوں نے خیبرپختونخوا کے شمالی ضلع شانگلہ کے سرحدی شہر بشام میں چینی انجینئروں کی گاڑی کو نشانہ بنایا تھا۔ حملے میں ایک خاتون سمیت پانچ چینی انجینئر اور ایک پاکستانی ڈرائیور ہلاک ہوئے تھے۔